काठमाडौं । एन्ड्रोइड र आईओएसबीच कुन अपरेटिङ सिस्टम उत्कृष्ट भन्ने विवाद कहिल्यै सकिँदैन । वर्षौँदेखि दुवै अपरेटिङ सिस्टममा थुप्रै अपग्रेड र युजर इन्टरफेस (यूआई) परिवर्तन हुँदै आइरहेका छन् ।
त्यस्तै दुवै अपरेटिङ सिस्टममा कतिपय समान किसिमका फिचरहरू पनि रहेका छन् । यस्ता आकर्षक अपडेट र यूआईमा परिवर्तन भइरहे पनि एन्ड्रोइडमा केही त्यस्ता कुरा छन्, जसको अभाव आईफोनमा सधैँ भइरहेको छ ।
आज हामी एन्ड्रोइडमा भएका, तर आईफोनमा नभएका आकर्षक फिचरका बारेमा चर्चा गर्दैछौं ।
मल्टिपल युजर र गेस्ट अकाउन्ट
मल्टिपल युजर र गेस्ट मोड स्मार्टफोन परिवार तथा साथीभाइसँग हुनेहरूका लागि वरदान नै हो । एन्ड्रोइडले भर्जन ५.० पछिका फोनमा यो फिचर ल्याउन थालेको छ भने आईफोनले यो फिचर वर्षौँदेखि अस्वीकार गर्दै आएको छ ।
यदि आफ्ना कोही साथी वा बालबालिकाले तपाईंको फोन प्रयोग गर्छन् भने यो मोड प्रयोग गरी आफ्नो गोपनीयता सुरक्षित राख्न सक्नुहुन्छ ।
अर्को व्यक्तिलाई फोन दिँदा गेस्ट मोड अन गरेर दिन सक्नुहुन्छ । गेस्ट मोडका लागि हरेक प्रयोगकर्ताको छुट्टै पासवर्ड, डेटा र एप हुने गर्दछ ।
यूएसबी प्रयोग गर्दा इन्टर्लन स्टोरेजमा एक्सेस
यदि तपाईंले आईफोनमा कम्प्युटरबाट आएको युएसबी केबलमा कनेक्ट गर्नुभयो भने, त्यसमा भएका फोटो तथा भिडिओमा विरलै पहुँच पाइन्छ ।
तर, एन्ड्रोइडमा यूएसबी केबल प्रयोग गरी कम्प्युटरका माध्यमबाट त्यसको इन्टर्नल स्टोरेजमा सम्पूर्ण पहँच पाउन सकिन्छ ।
साथै एन्ड्रोइडका फाइल कम्प्युटरमा र कम्प्युटरका फाइल एन्ड्रोइडमा ट्रान्सफर गर्न सकिन्छ । त्यस्तै एन्ड्रोइडमा भएको USB Tethering अप्सनका माध्यमबाट मोबाइलको इन्टरनेट पीसीमा समेत शेयर गर्न सकिन्छ ।
होम स्क्रिन कस्टमाइज गर्न सकिन्छ
आईफोनमा होम स्क्रिन आफूले चाहे अनुकूलको बनाउन केही सीमितता रहेका छन् । आईओएस १४ सँगै एप्पलले एप लाइब्रेरी, होम स्क्रिन विडगेट जस्ता फिचर समावेश गरेको थियो । तर, यी सबै एन्ड्रोइडले उपलब्ध गराउने फिचरका अघि फिक्का छन् ।
एन्ड्रोइडमा होम स्क्रिनमा भएका आइकन परिवर्तन गर्न सक्नुका साथै आफूले चाहे अनुसारको लन्चर प्रयोग गर्न सकिन्छ । त्यस्तै गुगल प्लेस्टोरमा त्यस्ता थुप्रै आइकन प्याक उपलब्ध छन् । जसका माध्यमबाट आफैले आकर्षक होम स्क्रिन कस्टुमाइज गर्न सकिन्छ ।
त्यस्तै एन्ड्रोइडमा केही पहिले नै इन्स्टल गरिएका थिम एपहरू हुन्छन् । यसबाट प्रयोगकर्ताले आफूलाई आवश्यक फन्ट, आइकन प्याक आदि राख्नसक्छन् ।
त्यति मात्र नभई एन्ड्रोइड प्रयोगकर्तालाई स्क्रिन सेटिङमा गई एपको साइज, एपको नोटिफिकेसन तथा एपको आइकन लुकाउन सक्छन् ।
डिफल्ट एप परिवर्तन
डिफल्ट एपका रूपमा आईफोनमा अन्य एपलाई प्रयोग गर्न सकिँदैन । आईओएस १४ पछि आईफोनले यस्तो फिचर ईमेल र ब्राउजर एपका लागि मात्र उपलब्ध गराएको छ । तर, एन्ड्रोइड फोनमा भने यसभन्दा धेरै डिफल्ट एप परिवर्तन गर्न सकिन्छ ।
उदाहरणका लागि प्रयोगकर्ताले डिफल्ट एप जस्तै; फोन, मेसेज, डिजिटल असिस्टेन्स, होम एप लगायत अन्य थर्ड पार्टी एपलाई डिफल्ट एपका रूपमा प्रयोग गर्न सक्छन् ।
अल्वेज-अन डिस्प्ले
अल्वेज-अन डिस्प्ले भन्नाले तपाईंको डिस्प्ले तपाईंले म्यानुअल्ली लक नगरेसम्म डिस्प्लेको लाइट बलिरहन्छ वा भनौँ डिस्प्ले अन भइरहन्छ ।
अल्वेज-अन डिस्प्लेका माध्यमबाट केही विशेष जानकारी जस्तै; मौसम वा फोनको ब्याट्री फोन अनलक नगरी हेर्न सकिन्छ । यसमा आफ्नो आवश्यकता अनुसार एपको नोटिफिकेसन पनि राख्न सकिन्छ ।
एमोलेड डिस्प्ले हुने एन्ड्रोइल फोनका लागि यो फिचर उपयुक्त हुन्छ । तर, आईफोनमा यो फिचर छैन ।
यदि तपाईंको एन्ड्रोइड फोनमा एमोलेड स्क्रिन छैन वा अल्वेज-अन डिस्प्ले फिचर छैन भने प्ले स्टोरबाट यो फिचर सपोर्ट गर्ने थर्ड पार्टी एप डाउनलोड गर्न सक्नुहुन्छ । तर आईफोनमा याे सुविधा छैन ।
एउटा एपको अर्को कपी एप
एन्ड्रोइड फोनजस्तै साओमी र वन प्लसले आफ्नो सफ्टवेयरमा एउटा त्यस्तो फिचर ल्याएका छन्, जसका माध्यमबाट कुनै पनि एपको कपी एप बनाउन सकिन्छ ।
यदि मुख्य एपमा केही महत्त्वपूर्ण काम भइरहेको छ, जसलाई खोल्न नमिल्ने अवस्था छ भने त्यसको कपी एप बनाई प्रयोग गर्न सक्नुहुन्छ । तर, यो फिचर आईफोनमा प्रयोग गर्न सकिँदैन ।
कल रेकर्डिङ
आईफोन प्रयोगकर्तालाई कल रेकर्ड गर्न सकस नै पर्छ । एप स्टोरमा उपलब्ध केही एपका माध्यमबाट रेकर्ड गर्न त सकिन्छ । तर, ति एप निःशुल्क पाउँन सकिँदैन ।
एन्ड्रोइड प्रयोगकर्ता प्रायः सबैको फोनमा डिफल्ट रूपमा कल रेकर्डिङ सुविधा रहेको हुन्छ । यदि बिल्ट-ईन सिस्टममा छैन भने थर्ड पार्टी एप डाउनलोड गरेर प्रयोग गर्न सकिन्छ ।
तर, गुगलले बिल्ट-ईन सिस्टम बाहेक अन्य कल रेकर्डिङ एप बन्द गराउने घोषणा गरेको थियो ।
Comments
Post a Comment
Thanks for your intrest